هذي قصه تموووووووووووت من الضحك جد لو ضايق صدرك بتستانس
اخليكم مع القصه
#(قصه عبدالعزيز)
.... من يفرقعها ....
هلا بكم ...إذا جلست فترة تبحث عن عمل أي عمل ما يهمك وش يكون . وبعد فترة تلقاه لازم تبذل قصارى جهدك علشان تحافظ عليه ..وهذا اللي صار لي بعد مالقى لي ولد خالي الكبير عمل في جريدة ( الخبر ) ..ورحت لرئيس التحرير ..أقابله واستلم العمل
رئيس التحرير : أنت عبد العزيز اللي ولد خالك عبدالله ..
أنا : أي نعم .هو اللي كلمك عني وتوسط لي عندكم
رئيس التحرير : أجل قلت لي وش يقرب لك عبدالله ..
أنا : رجل أمي ... وش فيك الله يهديك مو مركز معي أترك هالأوراق اللي معك ..ولد خالي عبدالله ولد خالي
رئيس التحرير : اسمح لي بس عندي مقابلة مع الوزير وجالس أراجعها قبل ما ننزلها في عدد بكرة
أنا : إذا مشغول عادي أروح أدور شوي وأرجع لك ما عندي شغل فاضي ..
رئيس التحرير : لا خلك خلاص فضيت لك .قل لي يا عبد العزيز عندك خبرة في الصحافة ..قد اشتغلت في مجال الصحافة ولا نشرت مقالات
أنا : والله الحمدلله عندي خبرة لا بأس بها يعني بس وقت الصحافة المدرسية وصحيفة الحائط
رئيس التحرير : ممتاز ممكن أعرف وش كان دورك فيها بالضبط يعني أنت رئيس التحرير ولا تكتب مقالات ولا تسوي مسابقات ..ولا ايش
أنا : لا مو لهالدرجة طال عمرك أنا بس كنت أعلقها على الجدار يعني الوكيل مستقصدني إذا ما حليت واجباتي يخليني أعلقها بس الحق حق كنت أقرى منها طشاطيش على الخفيف
رئيس التحرير : أجل تعلقها ..ما عليه ..طيب وش تحس أنك موهوب فيه وش ودك تكون محرر في ايش الرياضة ولا الفن ولا أمور الشباب والمجتمع ...
أنا : حطني في السياسة وما عليك إن شاء الله ما أخيب ظنك وأن ما في لي مكان الآن حطني في الاقتصادية إلى إن يفضى لي مكان
رئيس التحرير : أقول نبي واحد ويتابع أشياء غريبة ويأخذ رأي الناس فيها ..مثلا نبي نكتب مقال عن شارع الحرية ..
ونبيك تروح بنفسك وتغطيه ...
أنا : لا شف طال عمرك حرية ومقاومة ومعارضة ومظاهرات من الآن ما أبيها توني في ريعان شبابي
رئيس التحرير : وش ريعان شبابك وش تخربط أنت شارع الحرية . أشهر شارع تفحيط في الرياض وينك أنت وشلون ما تعرفه وش تعرف أجل
أنا : طيب أروح هناك وش أسوي اصفق لهم ولا وشو بالضبط
رئيس التحرير : يا أخي أنت شاب و أبيك تندمج معهم وتحاورهم ولا تبين لهم أنك صحافي وبعدين تأخذ صور وبس صعبة هالشغلة أبيك تعرف ليه هم يسوون كذا فهمت علي ولا لا
أنا : يعني تبي تحقيق بس كذا من عيوني الثنتين يا أخي ما طلبت شي كبير ابشر بالتحقيق اللي يوسع صدرك ..بس الله لا يهينك هالشارع وينه فيه
رئيس التحرير : من وين طلعت لي وش رأيك أوديك بنفسي ..شف تطلع من طريق الملك فهد بعد مخرج الثمامة ثم تسيد طوالي لين يصير السيدين سيد واحد بعدين بتجيك لفة على اليمين لا تدخل منها لأن الشباب يأخذون ارتداد منها أدخل من اللفة الثانية زين وتراهم يبدون بعد الساعة 11 في الليل
أنا : ما شاء الله عليك خبرة طال عمرك شكلك لك ماضي هناك ...
رئيس التحرير : يالله انفهق وبكرة أبيك تجيب لي ريبورتاج معك مفهوم ..
أنا : وين أحصله فيه ما أعرفه والله,, هذا سواق الجريدة ..
رئيس التحرير : ريبورتاج يعني المقال ولا التقرير فهمت ولا لا واضح أن علاقتك وطيدة بالصحافة
أنا : لا بس أنا تقدر تقول من أكثر الناس اللي تطالب بالتعريب في كل شي ..والحين عن أذنك طال عمرك ورانا شغل
وأطلع من مكتب رئيس التحرير و أروح استعد وأنطلق لهم من الساعة 10 نصف في الليل بالكراون فيكتوريا وأنا متلطم ومسوي فيها .وأقول لنفسي الحين لو جيت وصفطت معهم بيشكون فيني ويمكن ما يعبروني خير شر لازم أسوي شي يخليني أندمج معهم ووصلت لين الشارع اللي قال لي عنه رئيس التحرير ..أني لازم ادخل من اللفة الثانية بس أنا طرت لي فكرة ورجعت للفة الأولى واحمي الموتر وشوي وأدعس وأدخل في الطريق وأرمي الموتر يمين ويسار وتفحيط وشريط حسن بالونة على أعلى صوت والدرايش منزلة كلها ..وشوي واسمع الشباب يقولون عاش راعي الفيكتوريا ..واللي يقول يا راعي الفيكتوريا سلاسل سلاسل ..الحق ينقال ما أعرف وش سلاسل بس واضح أنهم مبسوطين ..وأنا أرمي في الموتر يمين ويسار ..لين خذاني الحماس ونسيت نفسي وشوي و أشوف السيارات تتفرق والشباب اللي يشجعون بدوا ينحاشون وأنا مو معهم بالمرة وواحد يقول يا راعي الفيكتوريا دوريات دوريات .. أنا قلت في نفسي اللي مشاني بالسلاسل يمشيني في الدوريات ( على بالي من حركات التفحيط ) وارمي السيارة يمين ويسار وعلى هالتفحيط لين شفت حولي أربع سيارات مرور ..ومحاصريني ..وكلها ربع ساعة إلا وأنا في مركز الشرطة وكلها نص ساعة إلا رئيس التحرير بنفسه جاي ( عقب ما اتصلوا عليه )
رئيس التحرير : خير خير يا حضرة الضابط وش صار عسى ما في شي كايد بس
أنا : لا لا تخاف ما في شي بس مو مصدقين أني صحفي وكنت أسوي تقرير عن شارع الحرية والتفحيط اللي فيه
الضابط : أي تقرير أنت ووجهك واحنا صايدينك وأنت تفحط
أنا : يا حضرة الضابط لزوم الشغل علشان أندمج بينهم ويآخذون علي والله العظيم مو لشي ثاني
الضابط : أي تندمج أنت ووجهك والهندي حارس الاستراحة يقول أنك لك نص ساعة تفحط تفحيط ما قد صار والشباب صاروا يصفقون لك بروحك ..
أنا : أما عاد من جدك تحكي ولا تبالغ شكلك تبالغ ..
رئيس التحرير : الحين قايل لك رح سو تقرير وتعرف عليهم وخذ وأعط معاهم تروح وتفحط ..وتقول تبي تندمج ليتك دابج في جدار من الجدران ومفتكين منك المهم يا حضرة الضابط وش المطلوب منه الآن
الضابط : أبد نبيك تكفله وبس وترى لو مسكناه مرة ثانية مسرع بنحطه في السجن و أنت معه فاهم ولا لا
رئيس التحرير : ابشر طال عمرك ..يالله أنت أمش قدامي يالله لا بارك الله فيك اللي هذا أوله ينعاف تاليه
أنا : أقول الله يسلمك بس إذا ما عليك أمر توديني للحجز اطلع سيارتي من هناك
رئيس التحرير : أقول انطم بس على فعلتك وتبيني أوديك بعد أنت تحمد ربك أني صابر عليك ..أي ليموزين يوديك يالله طس عن وجهي ...
و أخذ ليموزين واطلع سيارتي من التوقيف وثاني يوم الصباح أروح للجريدة و أقابل رئيس التحرير ..
أنا :طال عمرك سوري بس ما قدرت أسوي التقرير اللي طلبته مني يعني
رئيس التحرير : تستخف دمك أنت ووجهك ناسي أني أنا اللي كافلك أمس يعني من وين بتكتب تقرير بعد شين وقوي عين وجاي يعتذر المهم ..هالمرة بوديك تسوي تقرير ولا تندمج فاهم ما أبيك لا تندمج ولا تسوق سيارة سواق الجريدة بيوديك بنفسه ..
أنا : خير إن شاء الله مقابلة مع وزير يا ليت وزير الاتصالات عندي معه كم شغله بعد لو يشخط على فاتورتي مستثناة جزاه الله خير ..
رئيس التحرير : بتروح سوق التيوس ..أبيك تتابع مزاد التيوس السنوي ..وتشوف التيس اللي بيجيب أعلى سعر وتصوره وتقابل اللي اشتراه وراعيه الأول صعبه هذي إذا صعبة عليك مو لازم نكلف رئيس قسم الشئون السياسية يسويها عنك ويترك اللي في يده
أنا : وش فيك كأنك زعلان من سالفة أمس ترى كل شي كان سوء فهم بس أنت الله يهديك مكبر السالفة
رئيس التحرير : أقول أنفهق ولا تنسى تأخذ السواق معك مفهوم أو بالأصح تروح معه
وأنطلق ثاني يوم مع السواق يم مكان سوق الغنم ودخلت وسالت عن موقع مزاد التيوس وأتابع المزاد ويجي الدور على التيس سابق الريح ( مدري أسم تيس ولا مسلسل مكسيكي ) ويبدا عليه بالسوم أول الفتحه خمسين ألف ريال .. وأنا في نفسي أقول من هالخبل بيدفع خمسين ألف على تيس وشوي ويصيح واحد خمسة وخمسين ألف ويصيح ثاني ستين ويصيح ثالث خمسة وستين ويرجع الأول يقول سبعين ويرد عليهم واحد مندحش وسط الزحمة ثمانين ألف وشوي وينط واحد مية ألف وأنا مطير عيوني و أقول في نفسي حشا مو تيس هذا موتر وبعد نص ساعة أسمع المحرج يقول بثلاث مية وخمسين ألف ريال من يزود هاه من يزود خلاص نقول راح التيس راح التيس يالله حلال عليك ياللي هناك بثلاث مية وخمسين ألف ريال وأطمر أقابل اللي شراه يعني بسوي سبق صحفي وأشوف واحد معه مسجل صغير وأدزه ( شغل مذيعين ال ART ) وأوصل له
أنا : أنا من صحيفة الخبر يا أخي وش شعورك وأنت اللي شريت التيس
المشتري : الحمدلله وأحب أن اشكر حكومة خادم الحرمين الشريفين ..
أنا : طيب ما تحس أنها 350 ألف ريال كثيرة على تيس يعني ما تحس أنك تهورت
المشتري : لا وش كثيرة هذا سابق الريح لو يوصل السوم نص مليون بأشتريه هذا تيس فحل
أنا : يعني الله يهديك هو فحل وبقية التيوس تستخدم حببوب فياجرا تالي الليل ..يعني وش مميزه عن بقية التيوس
المشتري : بالله عليك شف شكله وحكم ضميرك تكفي شعيراته ..يكفي ذيله وش زينه يجنن بكرة عياله يجون مثله
أنا : طيب خل نفترض أنهم طلعوا على أمهم .. اسمح لي بس أبي القراء يطلعون على وجهة نظرك
المشتري : أنت وش تقول أنت قل لي وش تعرف بالتيوس ولا تدربي رأسك
أنا : أعرف أنها تستخدم في المندي ..يسقطونها في البرميل
المشتري : بسم الله عليه من البراميل والطبخ هذا سابق الريح شاريه علشان يجيب تيوس صغر مثله وشرواه ..
أنا : يعني و إذا جاب تيوس صغار خير يا طير بتدخلهم الجامعة إذا كبروا مصيرهم للبراميل
المشتري : فال الله ولا فالك أقول لك انقلع هناك بس هذا بدل ما تبارك لي جاي تحقق معي
أنا : طيب يا عم ممكن نآخذ صورة يطلع عليها القراء
المشتري : تقصد تبي تأخذ لي صورة هاه
أنا : وش أبي بواحد خبل مثلك قصدي الناس .تبي تشوف التيس اللي قيمته فوق قيمة بي أم دبليو يالله جب التيس خل نصوره ونخلص .يالله يا تيوسي واحد اثنين ثلاثة تشيييز ( ويطق الفلاش في عيون التيس ) وينهبل التيس وينطلق صوبي ويجلس ينطح فيني وأنا أبى أنحاش منه والتيس منطلق وراي ومرة ينطحني ومرة ينطح الكاميرا لين لقيت صالون صحن وأطمر في الصحن واتوزى والتيس ينطح في الصالون وينطح لين بعد أربع نطحات طاح التيس على الأرض وسط دمامينه ( دمامين = جمع دم ) ومات وينطلق راعي المشتري وهو يصارخ
المشتري : سابق يا سابق وش سويت فيه هاه موته يالمجرم
أنا : يا عمي روح تيسك اللي انهبل وجلس ينطح فيني و أنت تشوف ولا قلت شي ..
المشتري : والله قاتلك قاتلك ما يروح دم تيسي هدر فاهم ولا لا أنزل ولا طلعت لك
أنا : نتفاهم بس التيس بداله تيس و إذا على الشكل ولا يهمك نودي التيس الجديد لحلاق تركي يظبطه لك تظبيط بس وسع صدرك وش دم تيسك ما يروح هدر تعوذ من إبليس بس
المشتري : أقول بتنزل يعني بتنزل توحي الكلام ولا ما توحيه
أنا : ( ماسك الجوال وأدق على رئيس التحرير ) الحقني طال عمرك في واحد متخلف يبي يقتلني
رئيس التحرير : ( في الجوال )قل آمين عساه يقتلك ونفتك منك
أنا : أنت الحين تعال بس وبعدين نتفاهم أرسل أمنياتك الحارة لي عن طريق الايميل مو مشكلة
ويجي رئيس التحرير ..ويجتمع بالمشتري و أنا متوزي فوق صندوق الصالون الصحن .. ويتفقون على أن الجريدة راح تعوض المشتري بأن بتسوي نعي في صفحة كاملة للتيس سابق الريح و اعتذار خطي من الصحيفة وفوقها وانيت هايلكس موديل السنة مظلل ...ويعدي اليوم على خير وثاني يوم الصباح ..في الجريدة أدخل على رئيس التحرير
أنا: طال عمرك ودي أعتذر عن اللي حصل أمس بس التيس يوم قام يلحقني الكاميرا طاحت مني والدفتر بعد وعلى خبري أن التيس الله يرحمه ويغفر له كان هايج فالظاهر توطاهم في دربه فيعني ما في مقال آسف بصراحة مع أني كنت معد سبق صحفي بس الله ما كتب
رئيس التحرير : أنا اللي آسف أني شغلتك عندي في الجريدة بس خلاص هنا وكفاية
أنا : افا ليه زعلت طال عمرك خلك أنت الكبير بعد تعرف الواحد في بداية مشواره الصحفي يآخذه الحماس وتواجه بعض العثرات ولكن لابد أن يتغلب عليها مستقبلا
رئيس التحرير : أي مستقبلا و أي بطيخ أول يوم ماسكينك الشرطة وأنت تفحط وثاني يوم مكلف الجريدة إعلان قيمته ربع مليون وهايلكس مظلل المرة الجاية وش بتكلفنا مليون ريال
أنا : لا أوعدك المرة الجاية أسوي شي يجيب للجريدة ملايين أخلي الناس تتسابق عليها مسابق .أخلي الجرايد الثانية تخيس في البقالات وعد مني طال عمرك ...
من يفرقعها
الجزء الثاني
رئيس التحرير : لو مو عبدالله يقرب لك ولا كانت علوم المهم شف هذي آخر فرصة بأعطيك إياها في جراح تجميل لبناني اسمه ( زياد بتّه) واصل السعودية يومين في المركز التخصصي الطبي أبيك تقابله تعرف لو تسوي المقابلة صدقني أن العدد بيخلص من الأسواق الحريم بيطامرون بيشوفون وش الجديد في جراحة التجميل هاه أعتمد عليك
أنا : ولا يهمك أزهلها أني لا افصفصه لك فصفصة ما أخلي فيه شي باساله حتى عن اسم أمه ومقاس جزمته و أنت بكرامته وبأصوره وهو يتكلم وهو يأكل وهو منسدح ولا يهمك بتكون مقابلة الموسم صدقني
رئيس التحرير : أهم شي السرية والسرعة لو درت جريدة ثانية عنه وقابلته قبلنا بننحرق حرق والسرعة لأنه جاي الرياض في اليوم وبكرة الصباح ماشي بس جاي يعاين حالات
أنا : يالله أجل عن أذنك طال عمرك ما في وقت للسوالف
وبعد ست ساعات أدق على جوال رئيس التحرير
رئيس التحرير : ايوة وش المصيبة اللي جبتها هالمرة هاه قل لي
أنا : لا مافي مصايب ولله الحمد بس حبيت أبين لك الأمور ويكون كل شي واضح علشان ما تتهمني بالتقصير بعد ..هذاني حاشر رئيس قسم جراحة التجميل ومدير المستشفى حتى حقين السيكورتي ما في أحد منهم يبي يعترف و يقول أنه شاف ولا يعرف المدعو زياد بتّه تبي تسألهم بنفسك طال عمرك
رئيس التحرير : وشو وش هالحكي أمس مدير المستشفى قايل لي بنفسه ومدبر الموعد معك بالعافية علشان المقابلة ..أقل شي لو ما جا كان بيعطيني خبر
أنا : لحظة طال عمرك ..أنتم يالسملق من فيكم مدير المستشفى اللي لاعب على رئيس تحريرنا يجي يكلمه بالتليفون قبل لا يشوف شي ما يجوز له
مدير المستشفى : ايوة طال عمرك أنا مدير المستشفى بذمتك طال عمرك أنا مكلمك أمس ولا عمري كلتمك ثاني حاجه يعني والله عيب المحرر حقكم حاجرنا في زاوية بالعقال يعني لو يشوفنا أحد وش بيقول ما حلينا الواجب
رئيس التحرير : شكل في لبس في الموضوع ..ممكن تعطيني مراسلنا أبي أكلمه
مدير المستشفى : طال عمرك رئيس التحرير بتاع جريدتكم يبغى يكلمك
أنا : سم طال عمرك ..وش بغيت تبيني أمردغهم لك هنيا
رئيس التحرير : لا بس قل لي أنت وينك فيه بالضبط
أنا : زي ما قلت لي طال عمرك في مستشفى التخصصي
رئيس التحرير : قصدك مستشفى الملك فيصل التخصصي
أنا : يعني طال عمرك في مستشفى غيره تخصصي غير حق العيون ماني دلخ ألقطها وهي طايره
رئيس التحرير : يا ثور أنا قلت لك المركز التخصصي الطبي مو مستشفى الملك فيصل التخصصي البناية الطويلة اللي قدامه وشلون أنت تفهم بالله وش أسوى فيك قل لي بس رفعت ضغطي ناوي تموتني أنت
أنا : يعني مو المستشفى اللي أنا فيه ..
رئيس التحرير : لا مو هو ثانيا وش أنت مهبب مع الناس محجر لمدير المستشفى ورئيس قسم جراحة التجميل ناوي تسكر الجريدة ..المهم صرف نفسك بسرعة سو نفسك مجنون وأطلع من المستشفى لا يستدعون لك مكافحة الإرهاب ..و أول ما تطلع تدق علي فاهم ولا لا
واطلع من المستشفى بسرعة بعد ما سويت أنني أصور الكاميرا الخفية لرمضان الجاي ..و أدق علي رئيس التحرير
أنا : آسف والله آسف وجهي من كثر الحيا منك صاير كبر الليمونة مدري وشلون أصلح غلطتي
رئيس التحرير : الله يآخذك أنا وش خلاني أوظفك لا بارك الله فيك ولا في قريبك عبدالله ..المهم الجراح اللبناني ينتظرك علشان المقابلة عطيناه وعد
أنا : ولا يهمك أنا متوجه للمركز الطبي التخصصي مع أني ما أدري وينه بالظبط بس مصيري القاه
رئيس التحرير : أنت وجهك الدنيا الحين المغرب تبيه ينتظرك أنت ووجهك هو راح يسكن عند قريبه في مجمع البجعه الحمراء .. رح هناك حاطين خبر عند البوابة علشان يدخلونك فيلا رقم 17
أنا : وشو لا مجمعات أنسى طال عمرك وش يوديني مجمعات بايع نفسي لا وحقت أجانب قالوا لك خبل
رئيس التحرير : شف يا وجه 2الغراب ..أنت أن رحت مطرود و إذا ما رحت مطرود ومرحوم فقل لي وش بتختار ماني مفوت هالفرصة على الجريدة الرجال طيارته الساعة 1 الفجر لفرانكفورت ...
أنا : بس طال عمرك أمي محرجة ما أقرب شارع فيه مجمعات هالمرة تبيني أروح هناك بنفسي ما عندك خبر أن الرياض صارت فيها تفجيرات ولا تستهبل ولا وش قصدك ..
رئيس التحرير : يابن الحلال الديرة أمان رح وتوكل على الله وان حسيت شي يخوف انسدح وتشهد المهم المجمع موقعه كالتالي ............( لأسباب أمنية بحته ) يالله شد حيلك ولا تفشلني ..
وانطلق هناك واجلس ساعتين على البوابة تفتيش وتحقيق لين دخلوني وأتوجه لفيلا 17 و أقابل الجراح زياد بتّه
أنا : ممكن يا دكتور تشرح لنا وش الجديد في جراحة تكبير الصدور وهل أنت تلاقي عليها إقبال في منطقة الخليج ولا لا .. ووش المقاسات اللي عليها طلب أكثر
الجراح : ولو جراحة تكبير الثدي .. من أكثر الجراحات انتشار في العالم وبالذات في منطئة الخليج صبايا كتار بيعملوا هالنوع من العمليات ...أما الجديد فيها هو لستك الماي ..بتعرف الليتسك بتاع الكفرات هيدا متلوا ... بس بنعبيه مي
أنا : طيب يعني لستك ما تخاف يا دكتور أنه يمكن يبنشر .في الفراش ..
الجراح : هيدا ليستك مضمون مش أي كلام ..
أنا : طيب المقاسات كم ممكن تعطينا نبذه
الجراح : والله بيعتمد على جسم الصبية و إذا هي مجوزة ولا مش مجوزه ... ولا مخطوبة ولا بدا تنخطب بس يعني هيك شي ... بس بصراحة عندكون في الخليج الصبايا بيحبوا المئاسات الكبيرة ما بعرف ليش
أنا : موب شغلك أنا أعرف ليش ..طيب ممكن يا دكتور تعطينا نبذة عن أكثر الجراحات اللي لاحظت عليها إقبال في أثناء زيارتك للسعودية
الجراح : يوه يا حبيبي عندكم صبايا يعملوا سمكرة كاملة من تكبير الثدي إلى نفخ الشفايف إلى شد الوجه وشفط الدهون وتجميل الأنف والدئن ..والموضه هلا تطويل الرئبه مع أنها عملية صعبة شوي ومكلفة كمانا بس الصبايا بيحبوها كتير وفوء هيدا كله بدون يزرعون شامات على وشوشن
أنا : طيب سمعنا في الأيام الماضية عن جراحة شفط الدهون في من أماكن معينة ( شي في قلبه ) وجعلها بيضاوية أكثر ومشدوده ومنع الترهلات
الجراح : أماكن متل شو مش فاهم عليك يا زلمة
أنا : شف وش أنت جالس عليه يا دكتوووور ..عساك سالم بس
الجراح : ئصدك الكرسي ... آآآه فهمت لك كتير .هيدا العلميات أكتر شي في اللي أعمارن في التلاتينات وخلفوا أولاد
أنا : طيب يا دكتور ممكن تعطينا نبذة عن آخر الصرعات في عمليات التجميل ..
الجراح : غير تكبير الثدي عندك مثلن تكبير العيونات .. هيدا عمليات لساتا جديدي ليهون مستئبل
أنا : طيب يا دكتور ما في عندكم بشرى للي يشتكون من المشق
الجراح : عفوا شو المشاق هيدا
أنا : المشق مو المشاق .هذا في البرد القارص تشوف الجلد يتفتق يتمزق يعني ويخشوشن فما تصير تفرق هو جلد ولا زولية قديمة ... فهمت
الجراح : أي أي فهمت عليك ..بس هيدا حبيب البي مش من اختصاصنا هيدا من اختصاص تبعون الجلدية ..الديرما
أنا : طيب ما في عملية ترقيع للكيعان والركب ..يعني بدل الشهابة والسواد .. ما ترقعونها
الجراح : والله هيدي فكرة منيحه كتير بس ئولتك هيك عمليات ممكن تنجح عندكم بيطلع لها ائبال كتير
أنا : اووه ما أقول لك ما راح تلحق عليهم أبد السوق هنا يغطي على سوق الصين بس الله يخليك ليت تبدون تسوونها قبل ما أفكر أعرس ... زين يا دكتور بصراحة سعدت كثير بمقابلتك وآسف على التأخير اللي صار اليوم بس غصب عني والله حصلت ظروف المهم توصيني شي أنا طالع للجريدة الحين لا يصير شي وتضيع المقابلة ..
وأطلع من عند الجراح وأتجه لبوابة المجمع وهناك ..صار ما صار ...شفت سيارة جيب نازل منها اثنين برشاشاتهم ويطلقون النار على البوابة والثاني يقول بسرعة افتح البوابة السيارة الثانية جايه لا تأخرها ونبلش وأنا قدام بوابة الخروج يوم شفت الدعوى كذا وعلى مذهبي القديم الحديث العطة يا بطة بس لو عطيت وطلعت من السيارة بيلعنون جدي ويقتلوني ..ولو شافوني بيقتلوني في السيارة ..فقمت تقوقعت في السيارة تحت الدريكسون كلي بس ,,وصك رأسي في الدريكسون ومن الوجع طحت على دواسة البنزين وما وعيت إلا سيارتي تنطلق بأسرع ما عندها وتكسر البوابة وما وعيت إلا ببوم قوية ..أنا على بالي صار انفجار وأسمع صوت ناس يقولون وينه طلعه طلعه أنا على بالي رجال الدفاع المدني بينقذوني بعد الانفجار وقمت أقول أنا هنا شوفوني هنا تراني حي ما مت .واسمع واحد يقول هذا ابن الكلب اللي قتله نحتاجه جره جره وناس ينتعوني نتع من مكاني وأنا متكرفس ( متكرفس = متسفط منطوي ثلاث طويات ) تحت الدريكسون و أنا وقتها شعوري زي شعور أي مواطن سعودي الدفاع المدني على غير العادة ينقذه مبسوط ..
أنا : جزاكم الله خير الله يخليكم كنت بفطس بس الله فكني ..
رجال : اسكت يا عدو الله لا بارك الله فيك ..ويخطبني بشي على رأسي وافقد الوعي ..
وما دريت نفسي بعد فترة مدري كم ومكان مدري وين بس شكلها مزرعة أو استراحة و أنا مربط بحبال ..وحولي ناس جالسين ( مو مربطين مثلي ) وضايقة صدورهم
أنا : لو سمحتوا يا أخوان تراكم فاهمين السالفة غلط أنا مراسل صحفي في جريدة الخبر مالي دخل بالأرهابيين الله يأخذهم بس قولوا آمين
الرجال : كل تراب فاهم ولا لا أن سمعت صوتك مرة ثانية قطعت لسانك أنت ما تدري وش سويت
أنا : والله ما لي دخل بألارهابيين صدقني يا طويل العمر بس صادف الزمان والمكان
الرجال : أنت حرقت علينا عملية مخططين لها من ثلاث شهور كانت بتدوي في كل العالم يوم سويت فيها فارس وبتدافع عن وطنك ودعست البنزين وكسرت البوابة وصدمت السيارة اللي ملغمينها وقتلت السواق
أنا : أنا قتلت أحد وش تخربط طال عمرك تعوذ من إبليس وفهمني
الرجال : وأنت طالع بعنتريتك بالضبط دخلت على خوينا مصعب وهو في سيارته الكريسيدا الملغمة وهو متجه لبوابة الدخول .من قوة الصدمة مصعب مات على طول صدام موترك قطع رقبته نصين .. وفوق هذا كله عطلت العملية لان ريموت التفجير كان مع مصعب ولولا أن الله رحمنا ولا كانوا الكفرة المرور وصلوا وقبضوا علينا عرفت الآن وش سويت
أنا: طيب يومي أنا مبعثر تسبودكم ( كبودكم بس بالسعودي ) ليه خذيتوني ليه تعطلون أنفسكم علشاني والله ما استاهل الله يهديكم بس ...
الرجال : أولا نشوف ما نبي إعلامكم الكافر يسوي منك بطل قومي نبي العكس يطلعونك كافر إرهابي علشان تعرف تفزع مرة ثانية ...ثانيا نبي الأمير يشوفك ويطلع في حقك الحكم اللي تستاهله
أنا : أمير معكم أمير وش ذا تستخفون دمكم واحنا كل مكان نروح له نلقى أمير ما صارت حاله
الرجال : أميرنا شيخنا المجاهد مو أمرائكم أنتم الفسقة الماجنين
أنا : قصر صوتك لا يسمعونك ..وش فيهم كلهم ملح وقبلة
الرجال : الله يأخذهم ويأخذك قبلهم يا فاسق يا ماجن يا نصير الشيطان ..
أنا : والله يا خوفي أن لقطوك المباحث أن كل هالحتسي والعنتريات تختفي ويصيرون أملح ناس في الدنيا ..
وشوي ويجي واحد لابس بشت و كلهم يلتمون عليه يسلمون ويعزونه في اللي اسمه مصعب ويقولون له عظم الله أجرك يا أمير في مصعب ويقبل هالأمير صوبي
الأمير : أنت الفاسق اللي خرب العملية الجهادية أنت اللي أفسدت 3 شهور من التخطيط
أنا: أخبرهم أول يسلمون ..ثانيا والله مدري وش أنت تقول ولا وش تقصد بس يعني هو حادث مروري وحصل خير كل واحد يصلح سيارتكم وولدكم ندفع ديته ونصوم شهرين مو هذا حكم الشرع
الأمير : أنت يا فاسق صاير زي حكومتكم تسوي شي وتروح تقول الشرع وحكم الشرع ونطبق الشرع
أنا : أنا وش دخلني بحكومتي إذا هي فاسقة تفاهموا معهم تدري وشلون شيلوا علم فوق هالاستراحة وأعلنوا الاستقلال ولا تنسون تعزمون مراسل الجزيرة .. ولا مراسل البي بي سي ..
الأمير : تتريق أنت ووجهك بس تدري وش بيكون عقابك .. تدري ولا ما تدري
أنا : فلكة ( ضرب بالعصا من الرجل ) ولا بتحلقون شعري
من يفرقعها
الجزء الثالث
الأمير : أنت بطل عمليتنا الجاية وش رأيك ..
أنا : وش عمليتكم الجايه هاه ..
الأمير : شفت اللي سواه مصعب بتسوي مثله يالله بتصير شهيد وش قلت
أنا : لا ما اتفقنا مو أنا فاسق على آخر الدنيا فاسق بيسوي عملية استشهادية شف الفاسقين اللي مثلي حدهم تهريب, طقاق توزيع منشورات حبوب ..بس
الأمير : إلا بتسويها وغصبا عنك بعد أصلا بنكتفك في السيارة وواحد بيسوقها .. وش رأيك
أنا : لا الله يخليك وش ذا تربطوني في السيارة ليه يعني أونس اللي بيسوق قبل ما يموت ولا أخذ وصيته
الرجال : أنت ليه تناقش الأمير هاه ما تفهم ..ثانيا أنت تحصل هالشرف الأمير راضي عنك بيخليك تسوي عملية استشهادية وبيسوي منك شهيد من يطول هالشرف ..
أنا : يخوي متنازل لك عنها رح بدالي شف تبوني أنظف لكم الاستراحة من عيوني .. أطبخ لكم ما هنا مشكلة بس تفجير و ما تفجير سوري أما تقول لي لا تلعب بالنار تبوني على تالي عمري أعصي أمي وبعدها أموت
الأمير: للاسف مثلك هم اللي ضيعوا ديرتنا حكام ما غير يربون كروش وشباب ضايع أحد يعاف الشهادة الصحابة يومهم في عمرك يتسابقون على الشهادة مو يتنحشون عنها
أنا : الصحابة يومهم في عمري يجاهدون كفار يا يقتل يا ينقتل مو أدرعم في جدار وافجر نفسي و أقول شهادة ..و أنا قاتل لي كم واحد مسلم
الأمير : يا فاسق اسكت ولا تقول عنهم مسلمين هؤلاء كفار جلبتهم حكومتك الكافرة وقتل الكفار واجب على كل مسلم .. ولا عندك اعتراض هاه
أنا : و أنت كفرتهم كلهم ماشاءالله عليك طيب وش رأيك نروح نفجر في فلسطين على الأقل تبرد تسبودنا في هاليهود وقتها يعني الواحد يقابل ربه وهو مرتاح ..لو تبي بس شارون أوصف لي بيته وعطني صالون صحن اشحنه متفجرات لا أخليها دمامينه توصل الرياض من قوة التفجير هاه وش قلت
الأمير : أنت تستهبل ..الحين بدل ما تشكرني أني قررت أسوي منك شهيد وأغسل ذنوبك اللي كبر الجبال جاي تناقشني أنت وش قصتك بالضبط أبى افهم
أنا : بشويش ياللي مرة ما عنده ذنوب شف أنا قلت لكم تفجير ماني معكم أي شي ثاني ما عندي مشكلة
الأمير : الشور شوري مو شورك فاهم وبنربطك في السيارة بسلاسل حديد وبيقود السيارة واحد مسلم مخلص نعرفه ونثق فيه ..
الرجال : يا خبل قل سمعا وطاعه شهادة يعني من الدنيا للجنة على طول لا حساب ولا عقاب أحد يعاف الجنة لا ويقول الأمير الشهيد يعطى قصر في الجنة
أنا : ما قال لك على كم شارع .والله ما هو هين وقام يوزع صكوك الجنة يا ناس خافوا ربكم عمر بن الخطاب رضى الله عنه كان كل يوم يسال حذيفة بن اليمان ويستحلفه ويبكي عنده إن يقول له إذا هو من المنافقين اللي قال له الرسول اللهم صلي عليه أساميهم وهو عمر بن الخطاب ,, وخويكم حاط رجل على رجل ويوزع في صكوك الجنة وكل شوي مطلع فسح جديد ..
الرجال : أنت وش يدريك أنت بس لعبوا عليكم مشايختكم مشايخه السلاطين اللي حللوا الحرام وحللوا الحلال وعطلوا الجهاد ..أميرنا هذا تعلم الدين من أصوله على يد مشايخه حقيقين وجاهد في أفغانستان
أنا : ماشالله .واللي درسوه مشايخ من السي أي اأ ولا الكي جي بي
الرجال : انطم بس أنت فاسق وما منك رجاء يا حسافة الشهادة عليك
أنا : أقول يا أمير ممكن سؤال يعني إذا ما عندك مانع
الأمير : اسأل يا جاهل ..
أنا : الحين إذا لا سمح الله سويت عمليتكم الجاية بأصير على قولتك شهيد صح وعلى قولة الأخ على طول على الجنة بدون حساب ولا شي صح ..
الأمير : حلو بديت تقتنع ..ايه على طول على الجنة وفي قصر في الفردوس الأعلى
أنا : طيب ممكن أطلب طلب يعني قبل لا أموت يعني آخر شي آخذه من الدنيا
الأمير : أكيد أطلب على كيفك وش بغيت هاه مشتهي شي ودك تأكل شي ولا تسلم على أحد
أنا : بصراحة مستحي منك مدري وشلون أفاتحك بالموضوع .يعني لو ما فيها إحراج ولا كلافة أبى نانسي عجرم
الأمير : يا فاسق وش نانسي عجرم هذا هاه ..نوع من الحبوب ولا من أسامي الخرابيط
الرجال : طال عمرك يا أمير هذي مطربة ماجنة فاسقة تتعرى أمام الناس
أنا : لا أرجوك مو علشاني طلبتها تقوم تخرب سمعتها ولا تحط في ذمتك يا أخي أنت شفتها متفصخه ما عليها شي أتحداك إذا شفتها طلبتك توريني الصورة ..
الأمير : يا أخي دعك منه ..و أنت يا زنديق وش تبي بنانسي عجرم هاه قل لي وش تبي بها
أنا : أبيها تهمز رجولي متعبني الروماتيزم بعد أمير وأمير و أخرتها أنت في جهة والذهانة في جهة يعني طالب نانسي وشوله ..يا أخي أفهمني إحنا شباب زي بعض
الأمير : يا فاسق الحين وصلت بك المهانة كذا عيني عينك تطلب ماجنة من ماجناتكم .وللزنا وعندنا
أنا : ليتها من ماجناتي كان ما أطلع من غرفتي ابد كان أربع وعشرين ساعة معسكر فيها ..ثانيا ليه مكبر السالفة الله يرضى لي عليك مو تقول الحين شهيد والوعد الجنة على طول يعني الحين نانسي هالنتفة اللي بتدقر في الطريق لو أنها اليسا كان قلت بقرة تسويها ..هيفاء وهبي طويلة يجي منها بس نانسي يا جعل عمري عمرها .. يا حبي لها ودك تأكلها على مقاساتنا ثانيا مسيحية يعني من السبايا جاية على الجرح ..ووعد مني يا إذا جبتوها لي يا تسلم يا اجلس اقنع فيها لين أموت تراني مقنع صحيح أنى ما جربت من قبل كله نظري بس سبحان الله عندي حماس أني في العملي أعجبك
الأمير : أبي افهم أنت مجنون ولا تسوي نفسك كذا ..ما عندك احترام للدين ..بايعها مرة واحدة
أنا : والله مو كذا بس يا أخي يعني أنت مطلع لك أرنب وش ارنبه إلا بعير ومشيناه لك يلعن أبو أبليسك جالس في الثمامة وتوزع صكوك الجنة ..وياليتها على شي نقول من السنة إلا بدعة و فتنة أجل أحد يقتل مسلمين ويروعهم ويقول لنا الجنة وين يابو الشباب تبكش على هنود .. ثانيا أنت بأي صفة تحكي عن نانسي يمكن لو شافتني تتولع فيني وش هالنذالة حتى الحلوم بتنشبون لنا فيها
الأمير : أنت الحكي ضايع معك أصلا بس علاج الكلب أنك تسفهه
أنا : اسفهني أنا راضي بس مو تفجرني حتى الأمثال بتالفون فيها
الأمير : يا معاذ وين بطلنا أبو حمزة .. أبي ألتقي به وأعطيه كم وصية قبل ما يسوي العملية المنتظرة اللي أرجو من الله أن تهز أركان الطغيان في بلاد الجزيرة
أنا : قصر صوتك صدق أنك بايعها الحين يمرون مباحث يسمعونك وأبو حمزة يمدحونه ..ونعم به والله وسبعة أنعام يقولون ما أحد يسبقه في المرجلة حتى سمعت أنه ما يرضى يأخذ معه أحد إذا بيسوي عملية استشهادية خصوصا من الرخوم رجال نانسي فأقول كنسلوني من العملية الجاية ووزوني لا يدري بي ثم يهون
الأمير : أبو حمزة رجل باع الدنيا واشترى الآخرة رجل نوى الجنة ولا يقبل المساومة فيها وبتروح معه تدري ليه علشان نحاسبك على العملية اللي خربتها ونشوه سمعتك قدام العالم ونخلي أهلك يخجلون منك لأنهم شكلهم مثلك دام هذي تربيتهم لك
أنا : اها عاد كل شي إلا أهلي فاهم لا أجي أتوطى في بطنك كانك رجال فكني علشان أعرف أتفاهم معك والله ما يفكك مني أحد و هالجحوش اللي حولك ما يفيدونك ببصلة و لا حتى أبو حمزة خويكم هذا بعد ما بقى ألا أنت تحكي في أهلي
الرجال : طال عمرك هذا أبو حمزة بيتشرف بالسلام عليكم ... ويدخل بزر عمره 14 – 15 سنة
أنا : حتى أنتم بعد عندكم يتشرف بالسلام عليكم ..المهم أنت يا شاطر وين أبوك عساه هون أن شاء الله يالله يا حمزة الحق أبوك لا يجندونك بعد أنت ويغسلون مخك
الولد : ايش تقول هاه أنا أبو حمزة أنا اللي بسوي العملية الجاية جاي من أبو عريش خصوصا علشانها
أنا : الحين أنت يالبزر أبو حمزة ..شف يا أمير أنت أميرهم و أبخص بهم ..بس أرجوك رجاء خاص لا تنكل فيني وترسلني مع بزر توه ما بلغ وتصير خاتمتي معه ..
الأمير : وش فيه أبو حمزة بطل .ورجل يعتمد عليه أجل مثلك كل تفكيره بنانسي عجرم
أنا : يا عمي طير وين يفكر مثل هذا بنانسي عجرم أقول لك ما بعد بلغ وشلون أفهمك هذا حده فرقة بابا فين ولا بلاي ستيشن ولا كورة هلال ونصر و اتحاد
أبو حمزة : اسكت ايش تقول هاه أنت ما تدري أن الجهاد فرض عين على كل مسلم وين عقلك هاه
أنا : يا شاطر رح كل لك سيريلاك ...أول شي صم رمضان كله بعد فكر بالجهاد ..يا أمير رحم الله والديك طلبتك أنا أسوى العملية كلها لك وعن طيب نفس ولا تزعل بس لا ترسلني مع هذا ..وش تبي أهلي يقولون يوم ولدنا أنحرف واشتغل مع الأرهابيين راح يفجر ملاهي ..
أبو حمزة : وبعدين معاك هاه أمرط لك على حاجه وسد فمك بها
الأمير : يا أبو حمزة إحنا متوكلين عليك بعد الله أن تقود العملية القادمة بكل نجاح وتنتقم لنا من حكومة الفجر والكفر والطغيان وبتأخذ معك هالفاسق علشان نذله بس مثل ما خرب عمليتنا الأخيرة اللي كنا مخططين لها من كم شهر
أنا : يا عمي أنت روقنا ترى ذا بزر ما لقيتوا إلا هو دواسة البنزين ما يطولها برجله وتبيه يفجر لكم ..
أبو حمزة : يا أمير سكته جالس يحكي عليا .. والله لا أنط الآن عليه و أدبه
أنا : طير ما بقى إلا أنت عالم الطفل طلع لهم صوت وش قلت يا أمير أنا أنفذ لكم العملية الجاية بروحي بس لا ترسلوني مع هذا قصدي لا ترسلونه معي
الأمير : يا أبو حمزة بكرة بعد العشاء إن شاء الله تطلعون وتروحون لمجمع البطريق الخضر في العليا وبس تشوف سيارة داخله للمجمع تقتحم أنت وبسرعة والرشاش معك ولا توقف ولا شي واضح الكلام
أبو حمزة: ايوة تمام بسرعة السيارة أزرقها في المجمع وارعص على الزر الأحمر وخلاص
الأمير: ايه بس لاتنسى قبل ما تضغط على الزر الأحمر أنك تتشهد
أنا : اكتبها في دفترك زين يا شاطر علشان ما تنسى , أنت يا أمير وش دعوى يا أخوي نحلها ودي أنا قلت لك مستعد أروح بنفسي ومالك إلا اللي يرضيك لو تبي فجرت لك وزارة الداخلية بكبرها بس لا ترسلني مع هالبزقة ..أرجوك
الأمير : هذا مو بزقة البزقة أنت و أشكالك يا راعي نانسي ..أبو حمزة فارس من فرساننا أنا أشم فيه ريحة الجنة
أنا : أنا اشم خياس الله يكرمك وش جنته الرجال ما تسبح من كم شهر أرجوك وافق أي أحد إلا هو بليز
الأمير: يا شباب روحوا تعشوا الآن وبكرة بعد المغرب جهزوا كل شي واربطوا هالفاسق في الكرسي اللي جنب البطل أبو حمزة ابيكم تربطونه زين بسلاسل معدنية ولا تخلونها تبان
وثاني يوم بعد المغرب وهم يربطوني في مرتبة الكامري بسلاسل معدنية
أنا : الله يخليكم يا أنا يا هالبزقة ما يجي أنا و إياه في نفس السيارة لازم تختارون واحد مننا وأنا أرشحه هو
رجال : اسكت بس ولا كلمة يالله علشان نحط فوقك الجاكيت يعني متدفي عن البرد ..يالله يا أبو حمزة كل شي جاهز
أبو حمزة : يالله يا شباب في أمان الله وحفظه نلتقي بكم في الجنة الله الله بالجهاد من بعدي
أنا : حفايظ بامبرز اللي عندك ما راح تكتب فيها وصية .. يا شباب أرجوكم ترى بكرة الله يبلاكم
أبو حمزة : استغفر ربك أنت مقبل على شهادة وتجادل هاه الجنة ما تبي الجنة
أنا : أنا كل خوفي بكرة لا أطلع في الأخبار يقولون إرهابي وراعي بزارين ما تجي بيشكون فيني أني من عيال النسيم
أبو حمزة : هاه اسكت ولا كلمة يالله ..يالله يا شباب موعدنا الجنة
ويركب السيارة .. البزر أبو حمزة
أنا : تعرف تسوق ولا من الحين خلني أنزل هاه وش قلت ..
أبو حمزة : اسكت أنت ما تعرف تسكت خلني اركز الرياض هذي أول مرة أزورها ما أبى أضيع الحين فين العليا كيف أروحها ..ولا صح أنت مع الدولة مفروض ما أسألك
أنا : لا والله كدينا خير أول مرة تجي الرياض أجل يا خوفي تضيع بنا وننفجر تحت نفق وبكرة وزارة الداخليه تقول محششين خاشين في صبات
من يفرقعها
الجزء الرابع
وينطلق بنا أبو حمزة اللي حتى حميزوه يخب عليه ويجلس يلفلف بنا في الحواري يجي له ساعة ..
أنا : أنت يالحبيب ترى البنزين بيقضى وين بتروح وين مدرعم على الله
أبو حمزة : وبعدين معك ما قلت لك ما أبى أسمعك و أنا أسوق أبي أركز ..
أنا : طقني الجوع وأنت تلفلف بنا قسما بالله هذا تعزير مو عقوبة أموت في تفجير ومعك وأنا جوعان ورانا آخرة ما تفهم
أبو حمزة : اسكت قلت لك اسكت ولا كلمة الحين يقولوا في شارع العليا وين شارع العليا هذا ...كيف أروح له
أنا : الحين يا ثور أنت وين وشارع العليا وين أنت في الروضة ( شرق الرياض ) خلني أوصف لك ونفتك صدق الموت أهون من الحياة الشقية
أبو حمزة: ايه توصف لي ايه قالوا لك غبي علشان تودينا بعيد يا خادم الحكومة يا خادم الكفار
أنا : اها بس مو عيب واحد في عمرك يقول كلام أكبر منه أنت حدك بابا فرحان ..السالفة أني كرهت نفسي معك أي والله والله يشهد أني ما صارت تفرق معي إرهابي ميت .المهم افتك منك
أبو حمزة : أنا قلت لهم يعطوني جوال يعني بس هم قالوا أنت ميت وش تبي فيه علشان تفضحنا بالشريحة
أنا : إلا سلم لي عليهم مستكثرين عليك الشريحة أنت حدك جوال لعبة ينور لك ويرن و أنت تنبسط
أبو حمزة : لا أنا بنزل وبسال واحد وين شارع العليا كيف أروح له
أنا : والله أني جاد خلني أوصف لك ونخلص قسما بالله عليتني
وينزل أبو حمزة ويروح لبقالة علشان يستفسر عن الوصف ويقفل علي الأبواب و أنا ما أقدر أتحرك من السلاسل اللي مربطيني بها ويرجع للسيارة ومعه ورقة فيها الوصف ..
أبو حمزة : الحمدلله عرفنا الوصف يالله حي على الجهاد
أنا : وش جهاده طالعين من الساعة 7 والحين الساعة عشر ..تأخرت على وقت فراشك ترى أمك بتزعل منك إلا أمك تدري وش أنت بتسوي
أبو حمزة : أنا رجل وماني محتاج وصاية أحد علي ..ثانيا الصحابة كانوا يجاهدون وهم صغار وش فرقت يعني
أنا : يجاهدون مو يفجرون أنفسهم وفي ناس مسلمين ثانيا هالصحابة الصغار من كانوا يطلعون معه مع الرسول اللهم صلي وسلم عليه ومع الصحابة الكبار مو في سيارة كامري حتى الوصف ما يدلونه
أبو حمزة : أصلا أنت كافر ولا كان قلت الحقيقة إحنا ما نفجر إلا كفار الرسول يقول جزيرة العرب للمسلمين بس
أنا : يا ثور إذا جار الرسول كان يهودي وش تخربط أنت لا تصير مسجل تحفظ الكلام اللي يقال لك ولا تفكر فيه
أبو حمزة : اسكت ما أبى اسمع كلمة منك يالله هانت شوي ونستشهد ..
وشوي واحنا ماشين في السيارة وداخلين شارع العليا إلا رحمة الله تنزل علي ويطلع في الشارع تفتيش
أبو حمزة : ايش هذا لا ما ينفع ما قالوا لي ايش هاذا تفتيش ..شوف أنت لا تحكي ولا كلمة
أنا : ابشر من عيوني الثنتين بس عساك مجدد الاستمارة ومسوي التأمين و الرخصة اوف مشكلتك الرخصة عاد هم مانعين حتى التراخيص المؤقته يعني مالك عذر ..
أبو حمزة : شوف قسما بالله هاه لو تفتح فمك بكلمه لا أكون مفجر السيارة في وقتها هاه فهمت
أنا : أوعدك من صميم قلبي أني ما راح أتكلم ( ايه هين ) ... وفي نفسي أدعي الله أنهم يوقفوننا علشان اصارخ لأني المشكلة ما أقدر أحرك يدي ويوم قربت السيارة من التفتيش قام الشرطي الله لا يعافي أبليس و يأشر لنا نكمل ..وما صدق على الله هالبزر ( أبو حمزة ) وكمل وهو يضحك
أبو حمزة : شفت الله يحبنا ولا حب ينصرهم علينا هههاااي شفت كيف الله معانا من بيغلبنا .....
أنا : انتبه جعلك العمى ..هوووووووووووء طااع ( صدمنا ) في ليموزين
أبو حمزة : الله يلعنه ايش هذا ليه ما يعرف يسوق
أنا : جت من الله ,, ايه هو ما يعرف يسوق والدليل انك صادمه من ورى
وينزل راعي الليموزين الباكستاني وهو يهاوش ويزاعق وشوي وتجي الدورية و أقول في نفسي جا الفرج من الله
وهم يتناقشون و أنا في السيارة ما أدري وش يصير
الليموزين : هازا واهد مافي شوف أنا يمسي كويس وهو يزي بومب من ورى
أبو حمزة : اسكت يا حضرة الضابط أنا ماشي في دربي وفجأة هو طلع لي في الخط ما قدرت أتفاداه
الشرطي : تتصالحون فيما بينكم ولا كيف يا أخوان
الليموزين : لازم هو يدفع فلوس تسليه هازا بعدين شركة في يخصم علي وكفيل مال أنا يسفرني بلد مال أنا
أبو حمزة : ايوة ايوة أنت غلطان لازم ترجع بلد مال أنت ..ليه مافي يعرف يسوق كويس
الشرطي : يا أخوان الله يرضى لي عليكم تتصالحون فيما بينكم ولا كيف
الليموزين : هازا لازم في شركة يزي علشان فلوس تأمين وتسليه سيارة بعدين
أبو حمزة : لا ما في يجي أنت غلطان بس شوف علشان أنا إنسان كويس وفي يخاف من الله خلاص أنت روح في سبيلك مابي منك حاجة شوف كيف أنا مرة كويس معاك
الشرطي : يا جماعة الخير تراكم صيفتوا علي .تتصالحون فيما بينكم ولا لا
الليموزين : لا ما في سوله هو لازم مندوب سركة في يجي أول
أبو حمزة : لا في صلح وخلاص يا صديق ما صار شي سيارتك ما فيها شي بس الصدام الخلفي شوي انعفط وتكسر بس والله شوي يتصلح يا رفيق
الشرطي : لاحول يا ناس والله لي ساعة معكم تعبت بتتصالحون ولا بتروحون معي للقسم نتفاهم هناك
الليموزين : لازم في يروه بوليس لازم ولا وازد مشكل
الشرطي : يالله تعالوا معي .. لقسم مرور العليا
أبو حمزة : يا حضرة الضابط معي واحد مجنون وتونه معطينه حبوب مهدئه ومربطينه في السيارة ويالله مربطينه في السيارة .. وأنا أحاول أصارخ من السيارة بس ما يوصل صوتي .. والشرطي صدق أني مجنون
الشرطي : خلاص أول ما تحطه في المستشفى الحقنا للقسم وأنا بأخذ رخصتك لين تجي للقسم
أبو حمزة : مات معي رخصة أنا قصدي ضايعه قصدي في البيت ..معي بطاقة الأحوال تنفع
الشرطي : يا جماعة ما ودك تتصالحون ...هات بطاقتك ولا تتأخر علينا ترانا في مرور شرق الرياض
ويرجع أبو حمزة وهو يرقص فرح ..الله يحبنا شايف كيف الله يحبنا لو الله ما يحبنا كان انكفشنا بس صدقوا أنك مجنون و خلوني أوديك للمستشفى ..ما بقى إلا الخطوة الأخيرة ونوصل للي نبيه
أنا : وش هالحظ ..المشكلة حظك عكس ريحتك هذا اللي يقهر ..
أبو حمزة : الحين بقت لنا الإشارة الجايه بعدها نلف يسار وخلاص
أنا : وخلاص ونفترق يا أخي ودي أكذب و أصير مصري و أقول بتوحشني ولا بأفتقدك بس ماش ما يطاوعني لساني
أبو حمزة : أنا إن شاء الله رايح للجنة قصر فوق في الفردوس أما أنت والله ما أدري عنك ماش تدخلها ولا لا
وتصير الإشارة خضرا وتو هالبزر بيلف إلا في سيارة جيب مظللة مسرعة جايه من الجهة الثانية ووراها سيارتين شرطة يلاحقونها ويالله يتفاداه مع أني ما توقعته منه و نصير إحنا وسيارة الجيب جنب بعض والشرطتين ورانا
أبو حمزة : هذولي أكيد مجاهدين مثلنا لازم نساعدهم
أنا : لا والله مخلص الحين رايح تموت نفسك وتبي تفزع لناس في الدرب أنت ناوي تشنّع فيني ( تشنّع = تبشع وتعذب وتطلق كنوع من التعزير )
أبو حمزة : هذولي مجاهدين مثلنا قصدي مثلي أنا بس هاه لحظة بزاحم ( بأحد ) الشرطة الفجرة
أنا : يا ابن الحلال من زين سواقتك يوم تبي تزاحم الناس ولا ناوي تسوي حادث ثاني
أبو حمزة : الحين أوريك السواقة الصح بألف على الشرطة وأخليهم يخشون في عواميد الكهرب ... ويلف أبو الشباب ..ويضربون له الشرطة بواري ويكبسون .ويطلع خوينا ذروق ( ذروق = خواف مثل الدجاجة تنحاش من صوت القطوة ) .. ويرجع يلف الجهة الثانية وتقوم الدورية الثانية تضرب له بوري وتكبس ..ويرتبك وما دريت إلا السيارة صارت فوق وخشينا إحنا في عواميد الكهرب والحمدلله كنا رابطين حزام الأمان ولا نتقنا ( نتق ينتق ينط لا شعوريا ولا أراديا ) من قزاز السيارة والدوريات تركونا وكملوا مطاردتهم
أنا : عمى عمى الله لا يعافيك وش سويت فينا اشهد بالله إن الموت أهون من الحياة الشقية .
أبو حمزة : الكفار الكفار شفت ايش عملوا فينا ..ويلهم من الله شوفت ( شفت بس بلهجتهم ) كيف عملوا فينا
أنا : هم وش دخلهم في ثوارتك ..بعد هم اللي قالوا تتفلسف وأنت ما تعرف تسوق
أبو حمزة : المهم يالله نلحق على المجمع ونخلص مهمتنا ما بدنا نتأخر أكثر
أنا : اللي يسمعم يقول يبينا نخلص بسرعة علشان نسري لبيوتنا تراك رايح تنتحر تعرف وش معنى تنتحر
أبو حمزة : أنا رايح استشهد مو انتحر الانتحار للكفار مو لنا ماشي تفهم شي كلام هذا لا تعيده
أنا : أفتيت يا سيادة المفتي ..طيب المفتي حقنا يقول هذا تخريب وانتحار ويعتبر من الإفساد وش رد سعادتكم
أبو حمزة : هذولي علماء دولة اللي يسمونهم علماء السلاطين باعوا ضمايرهم من أجل فلوس السلطان
أنا : وش السلطان شايفنا في عمان .اسمه الملك والأمراء ..طيب الزبدة يعني رأيك نسحب عليهم سيفون ونتبع شيوخكم صح ليه مثل ما نطنطوا لأفغانستان وحاربوا هناك ليه ما ينطنطون على اسرائيل وعندكم فيهم لا تخلون فيهم ذرة وشف من بيقول لكم شي
أبو حمزة : لا تغير الموضوع إحنا مسلمين غصبا عنكم ومجاهدين ضد حكومتكم الكافرة ..فاهم
صوت غريب ... تبون فزعة يا شباب ... سالمين سالمين حديد حديد ما في إصابات إن شاء الله ..الشباب دافيين أبيض ولا عرق ( ابيض = مخدرات ,عرق = خمر محلي )
أبو حمزة : أنت مين هاه مين أنت ايش تبغى اعترف ..ترى معي متفجرات بأفجر الحي كله ابعد
الرجال : محاتسيك ( اللي يتكلم معك الآن ) أبو زيد اشهر سواق أوتوبيسات في الرياض خط البلدة . عساكم سالمين
أبو حمزة : أنت كذاب أنت شكلك مع الشرطة ابعد ولا فجرتك ابعد
الرجال : تهبا يا ذا الوجه أثرك مو راعي حشيمة إذا معك متفجرات معي في السيارة عجرا أكسر رأسك بها
أنا : يا أبو زيد جزاك الله خير بس شكلك ما استوعبت هالبزر للاسف معه متفجرات لو فجرها تخسف بالحي كله إن تطلع المنطقة كلها آبار ارتوازية
الرجال : تهبا أنت و اياه الحين أدق على زيد يجيب ربعه والله نرضرض عظامكم الحين يالسلق موقف الأوتوبيس باب رزقي وأبى أساعدكم أن كنتم رجال أطلعوا من السيارة ولا الحين أطلع لكم أكسرها فوق روسكم
أنا : لا واللي يرحم والديك لا تحط عقلك بعقله .هو صدق ماله عقل بس السلاح بيد الغشيم يجرح ابعد عنه
الرجال : لا أبى أشوف وش وراه ولا بس كلام من بعيد ووقت الجد دجاجة تبيض
أبو حمزة : إن كنت راجل اقترب هيا اقترب هاه والله أفجرك أوديك النار على طول
أنا : أنت انطم وش توديه النار معكم صكوك الآخرة يا أبو زيد بصراحة مدري من وين تفهم أنت بس الحاصل أن هذا إرهابي فهمت إرهابي
الرجال : وشو من التسعة طعش ( 19 تنطق كذا ) يا وجه الله آسف آسف والله طال ع
الإثنين أكتوبر 11, 2010 5:54 pm
