كيف تطلب الستيك؟؟؟..........................................

كيف تطلب الستيك

كثير من الشعب السعودي يحب اللحم , واذا راح للمطاعم يشتهي يطلب ستيك .
طبعًا يجلس الواحد يقلّب في المنيو ويشوف أنواع الستيك الكثيرة ويحتار وش يطلب ,
أساسًا البعض يقول كله لحم وش الفرق بالله , واذا رسى له على نوع ستيك
وسأله الويتر كيف تبي طريقة الطبخ ؟! , يفك فمه ويقول أنت وش تنصحن ؟! ههههههههههههه

المهم .. يوم شفت الوضع السيء عند البعض وليس الكل , قلت بنزل هالموضوع
اللي يشرح أنواع قطع الستيك , والفروقات بين طرق الطبخ وكيف يأثر هذا كله على طعم الستيك !

* *



أول شي نشوف هنا شكل البقرة ومن وين ياخذون قطع اللحم , كل جزء مبين عليه
الـ Cuts ومن وين ياخذونها من أي جزء .. الـ Sirloin والـ Rib واضحين , والباقي بوضحه
بعد شوي كل واحد على حدة ان شاء الله

* *


أنواع الستيك /

طبعًا الستيك أنواعه كثييرة , وتعتمد على البلد والأنواع اللي دارجة فيه وتلقى قبول من الزباين !
بالنسبة لـ عندنا واللي موجود بـ مطاعمنا من خلال تجربتي لقيتها تقريبًا 4 أنواع , راح أخذها
كل واحد لحال .. وأشرح وش وضعه بالضبط ويفرق عن الباقين بـ ايش

,

Sirloin Steak



شحم قليل والنكهة موجودة , السيراليون هو الأكثر رواج عندنا بالسعودية , ميزته أن سعره
عادةً يكون أقل من الباقين وبنفس الوقت فيه نكهة , والنكهة طبعًا جاية من الشحم اللي فيه
وزن السيراليون بالعادة معقول ومُشبع لـ الشخص الجوعان .. وسعره بعد يكون معقول جدًا .
طبعًا لو ترجعون لصورة البقرة بتشوفون من وين ينأخذ السيراليون وعادة ياخذونه من فوق .

بـ اختصار لو ما تبي تتعب راسك , اطلب هذا وأنت مرتاح , لأنه فيه شوي من كل شي .


Tenderloin Steak , Fillet Mignon



التيندرلوين أو الفيليه منيون , حطيتهم كلهم في نوع واحد لأنهم تقريبًا نفس الشي .. ميزة
هالنوع أنه بدون شحم ! .. اللحم يجي طري مررة وهو الاختيار الصحي دايم , بس لو نرجع
مرة ثانية لصورة البقرة اللي فوق وندور عن المكان اللي ياخذون منه التندرليون بنلقاه صغير
وهذا اللي يسبب أن هالنوع بالعادة يكون غالي ! , & شي ثاني لازم تنتبهون له وتعرفونه
أنه هالنوع بالعادة يجي وزنه أخف من باقي الستيكات .. لأن الشحم هنا ما ياخذ مساحة وبحالة
الفيليه منيون يكون شكل اللحم دائري وتجي القطعة صغيرة وبالعادة ما تشبّع الناس الجوعانة

يعني لو تبون شي صحّي & بدون شحم , وبنفس الوقت انتم مب جوعانين مرة , اختاروا هذا


T-Bone Steak



من اسمه واضح وش فيه , فيه عظمة على شكل حرف T , وعلى أجنابها فيه اللحم ..
وطبعًا موجود شحم بهالنوع , ميزة هالستيك بـ وزنه الكبير عادةً وكمية اللحم الكبيرة اللي فيه !
هذا النوع هو المُفضل للناس اللي تقدّر الستيك لأن طعم اللحم اذا انطبخ يصير بطل ,
ولكن بنفس الوقت للي مهب راعين ستيك ما يجوز لهم مرة لأن تقطيعه مشوار والعظم يسوي زحمة
سعره غالي بالعادة وهذا شي طبيعي بسبب وزنه الكبير مقارنة بباقي الانواع .

اللي يبي يطلب هذا يا يكون مجربه قبل أو جوعان ووده يضرب بـ لحم صدقي


Rib Eye Steak



هذا هو أكثر الأنواع شحم , وبالتالي الأقوى بالطعم .. طبعًا هالنوع ما راح يجوز الا للناس
اللي تحب طعم اللحم اذا انطبخ مع الـ Fat , ومتداول في أمريكا كثيير ويعشقونه هناك

,


* *

أنواع الطبخ /

الأنواع تتراوح بين Rare (( ني )) و Well Done (( مطبوخ )) , بس بما أن محد
يحب الني وهالأمور اللي مالها داعي , بـ أختصر السالفة وبحط الـ 3 أنواع المهمة ..

Medium



مثل ما أنتم شايفين بالصورة , هذا هو الميديم .. الطبخ يكون نص استواء , من الداخل
بيكون لون اللحم وردي ومن برى بني , وقت الأكل بيكون الطعم Juicy شوي ومهب ناشف .

Medium Well



نفس الشي نرجع ونشوف الصورة , هذا بين النص استواء والمستوي , بالنسبة لي هو
أطلق شي , يجي اللحم طري من جوى بس بنفس الوقت مطبوخ وما يوجع البطن
يعني اذا رجعت البيت ومع البيبسي الأكل يتهضم ومهب يجلس على قلبك , الخيار الممتاز

Well Done



مطبوخ بالكامل , مشكلته أنك ما تضمن المطعم ممكن بكل سهولة يحرقونه لك من الأطراف
ويصير ناشف وتتغصبه , ما أفضله أنا أبدًا لكن يمكن للناس اللي ما تحب الستيك
او اللي تحب الأكل مستوي يكون هذا الخيار الأضمن , مشكلته بعض الاحيان يكون ناشف .

* *

Steak Sauces



أنواع الصوصات كثيرة , لكن هالنوعين أبرزها , الـ A1 موجودة بـ أمريكا ومنتشرة
هناك , اما الـ HP هذي في بريطانيا .. بالنسبة لي أفضل الـ A1 , الثانية ما خشت مزاجي
ريحتها أساسًا تكرم النعمة مدري وشلون , وطبعًا لا مانع من حركاتنا والشطة والليمون والكتشب