حبايبى السلام عليكم اثناء تصفحى فى النت لقيت لكم هذى الطريقة للورق عنب الصحيحة والجديدة بذوقها وطعمها...ارجو انكم تجربونها ولا تخلونها....وادعولى ...
تقول راعية الطريقة::
عندي طريقة ورق عنب بالزيت اينن احلى بألف مرة من المطاعم ماخذة الطريقة من وحدة سورية ..
ماطول عليكم اعطيكم المقادير والطريقة ..
وسامحوني اذا كانت مقاديري مو مضبوطة الصراحة مقاديري تقديرية شوفي شكثر يناسبج وحطيه لأن في ناس يفضلون يزيدون شي ويقللون شي ...
بس انشالله يكون كل شي واضح
المقادير ]
غرشة ورق عنب (انا افضل ماركة الصقر احسن نوع جربته)
4 فصوص ثوم مقطعة شرايح (حسب الرغبة)
بطاط مقطع حلقات متوسطة السماكة
الحشوة :
تقريبا قلاصين عيش مصري تغسلينه وتنقعينه شوي بماي
طماط مفروم ناعم
بصل مفروم ناعم
ثوم مهروس (انا احط تقريبا قفشة ونص كبار متروسين)
بقدونس مفروم (انا ماحطه ماحبه بس موجود بالطريقة الاصلية)
ليمونتين معصورين
شوية زيت ذرة انا احط تقريبا قفشتين كبار او ثلاث
الصلصة :
زيت ذرة تقريبا ثلث قلاص
زيت زيتون ثلث قلاص
عصير ليمونتين او ثلاث
دبس رمان رشة بس
قفشة كبيرة صبار مذوبة بنص قلاص ماي
ماي تقريبا اعلى من مستوى ورق العنب بسانتي واحد
الطريقة :
تخلطين مقادير الحشوة كلها مع بعض وتخلينها على صوب
تاخذين ورق العنب وتغسلينه زين بعدين تنقعينه بماي مغلي شوي علشان ينضى بسرعة وممكن تكررين هالخطوة مرتين انظف واحلى
بعدين تلفين ورق العنب عادي .. بس تخلينهم ضعاف وطوال
تاخذين الجدر .. تمسحينه بزيت ذره ...
وتصفين حلقات البطاط دار مدار الجدر وعلى الاجناب ..
وتصفين ورق العنب فوقه ... وانتي تصفينه تقطين داخل الجدر شرايح الثوم المقطعة يعني يصير بين ورق العنب ...
الحين تحطين فوقه مقادير الصلصة والماي ..
وتخلينه اول يطبخ على نار عالية بس يغلي دقيقتين وقصري الجولة وحطي تحته حديدة ..
وغطي الجدر بصحن او شي وحطي فوقه ثقل ...
انا احط غرشة ورق العنب واترسها ماي ... (ديري بالج مو تحطينه فوق غطا الجدر لأنه يوصل الحرارة بتنكسر )
وخليه جذي تقريبا اقل من ساعة بتحسينه نضى .. يعني انتي وتقديرج ..
وزينيه بالخس وشرايح الليمون ....
ترى الطريقة سهله بس مبينه طويلة لأني كاتبتها بالتفصيل والا ماتبي شي ..
تزهبون الحشون وتلفونه وتطبخونه بس ..
وانا مرات اثلجه قبل لا اطبخه واخليه بالفريزر حق الازمات
الإثنين يوليو 11, 2011 7:28 pm
